Опозициската СДСМ остро ја критикува Владата, обвинувајќи дека не презела никакви мерки за заштита на животниот стандард на граѓаните во пресрет на велигденските празници.
Според СДСМ, Владата предводена од Христијан Мицкоски ги оставила граѓаните сами да се справуваат со растечките трошоци, токму во период кога, како што наведуваат, семејните буџети се под најголем притисок.
Од партијата тврдат дека наместо конкретни мерки, извршната власт најавува анализи и одложени решенија по празниците, игнорирајќи ги, како што велат, нивните предлози за намалување на цените на храната и горивата.
Во соопштението се посочува дека велигденската трпеза е значително поскапена, со јагнешко месо до 700 денари за килограм, повисоки цени на јајцата, зејтинот и зеленчукот, при што дел од граѓаните купуваат минимално или воопшто не купуваат.
СДСМ оценува дека ваквата состојба е резултат на, како што наведуваат, задоцнети и погрешни економски политики, обвинувајќи ја Владата дека го штити профитот на бизнисите наместо стандардот на граѓаните.
