СДСМ обвини дека во над 50 населени места во Македонија водата не е безбедна за пиење и побара политичка и кривична одговорност за состојбата. На прес-конференција, портпаролката Маја Серафимовска Борозан оцени дека станува збор за, како што рече, институционален колапс и ја обвини Владата за задоцнета реакција.
Според СДСМ, меѓу местата каде што водата не е безбедна се Гостивар, Крушево, Валандово, Булачани, Пласница, Лешок, Преглово, Маврово, Рич, Белотино, Башино Село, Елшани, Велестово, Ново Село, Сушица, Зубово, Државо, Гарани, Шутово и други населени места.
Од партијата посочија дека во Гостивар постои ризик од појава на жолтица и тврдат дека Владата реагирала со задоцнување.
„Иако претседателот Филипче уште пред две недели алармираше за ризикот од жолтица, власта дури вчера излезе со препораки за превенција и откривање симптоми“, рече Серафимовска Борозан.
Таа додаде дека сè уште не е објавен извештајот за квалитетот на водата во Гостивар и побара да се соопшти кој ја одобрил и гарантирал безбедноста на, како што рече, „техничката вода“.
СДСМ посочи и дека, според нив, премиерот Христијан Мицкоски и министерот за здравство Сашо Клековски излегувале со различни изјави за состојбата со водата во Гостивар.
„Ова е тотален институционален колапс. Резултат на неспособност, небрежност и целосно игнорирање на основните потреби на граѓаните“, рече Серафимовска Борозан.
Од СДСМ побараа:
итна политичка и кривична одговорност;
јавно објавување на сите анализи и причините за загадувањето на водата;
итна интервенција и обезбедување чиста вода за сите засегнати населени места.
„Македонија не смее да биде држава во која основното човеково право – чиста вода за пиење е луксуз“, порача Серафимовска Борозан.
