СДСМ: Зошто владата на Мицкоски не објавува документ за водата во Гостивар?

СДСМ преку соопштение ја повика Владата јавно да ги објави сите извештаи и анализи за квалитетот на водата за пиење во Гостивар, оценувајќи дека граѓаните добиваат спротивставени информации, наместо јасни и проверливи податоци.

Од партијата потсетуваат дека министерот за здравство Сашо Клековски најавил дека до крајот на неделата водата во Гостивар ќе биде безбедна за пиење, додека, според нив, премиерот Христијан Мицкоски подоцна изјавил дека во водата биле откриени „нови бактерии“.

— реклама —

„Секој излегува со различни тврдења, а граѓаните остануваат збунети и не знаат кому да веруваат“, велат од СДСМ.

— реклама —

Партијата тврди дека повеќе од 4.000 лица се затруле во Гостивар и прашува зошто досега не се објавени официјалните документи за квалитетот на водата.

„Нема јавно достапни извештаи, нема анализи, ниту информации кој ги потпишал и одобрил. Како граѓаните да имаат доверба кога нема официјална документација за состојбата со водата?“, наведуваат од СДСМ.

— реклама —

Во партиското соопштение се додава дека претходното прикривање на резултатите, според нив, довело до повеќе од 4.000 заразени лица и појава на епидемија на жолтица во Гостивар.

— реклама —

СДСМ упати критики и поради тоа што, како што наведуваат, за прашања поврзани со водоснабдувањето и хиперхлорирањето говореле функционери кои немаат соодветна стручност.

Од партијата побараа надлежните институции уште денес да ги објават сите извештаи за водата во Гостивар и јасно да соопштат која институција гарантира дека водата е безбедна за користење.