Се бара притвор за поранешен српски министер за економија осомничен за злоупотреба

Поранешниот министер за економија на Србија, Раде Баста, е осомничен за злоупотреба на службената положба, а Вишото јавно обвинителство во Белград побарало за него притвор до 30 дена поради опасност од бегство и можност да влијае врз сведоци.

— реклама —

Според информациите што ги пренесува „Танјуг“, Баста се сомничи дека во периодот од 27 ноември 2020 до 6 јуни 2022 година, додека бил на чело на ЈКП „Белградски електрани“, донел 10 одлуки за доделување парични донации без законска основа.

— реклама —

Станува збор за вкупно 14,1 милион динари, кои биле исплатени на здруженија и спортски организации спротивно на прописите за доделување помош. Според обвинителството, извршната директорка за економско-финансиски работи ги реализирала исплатите и покрај тоа што била запознаена дека одлуките и договорите за донации не се во согласност со прописите.

— реклама —

На дел од претставниците на здруженијата им се става на товар перење пари во вкупен износ од шест милиони динари. Според сомневањата, тие подигнувале дел од средствата како провизија, а остатокот му го предавале на осомничениот Ж.В.

— реклама —

Обвинителството побарало притвор и за Ж.В., додека на останатите осомничени им било укинато задржувањето. На Баста му се става на товар продолжено кривично дело злоупотреба на службената положба, а на другите осомничени перење пари или помагање во злоупотребата.