Кривичниот суд во Скопје му одреди осумдневен притвор на 44-годишниот И.Д. од Скопје, осомничен за палење на две службени возила на Бугарската амбасада. Судот го прифати предлогот на Основното јавно обвинителство, кое против него поведе постапка за кривичното дело „Предизвикување општа опасност“.
Инцидентот предизвика нови реакции во Бугарија. Македонската амбасадорка во Софија, Агнеза Руси Поповска, беше повикана во бугарското Министерство за надворешни работи, додека бугарскиот пратеник Ангел Георгиев од партијата „Преродба“ најави дека ќе предложи претседателот Румен Радев да побара од Европската Унија да ги запре европските средства за Македонија.
Од македонската Влада повторно го осудија настанот и порачаа дека истрагата продолжува. Премиерот Христијан Мицкоски изјави дека случајот мора целосно да се расчисти пред да се носат какви било заклучоци.
„Најсилно го осудуваме овој чин и во рамките на законските надлежности ќе постапиме соодветно. Очекувам да биде расветлено сето она што е во позадина на овој случај“, изјави Мицкоски.
Во меѓувреме, бугарската „Фондација Македонија“, предводена од Виктор Стојанов, најави протести и двочасовна блокада на граничните премини „Деве Баир“, „Делчево“ и „Ново Село“ во недела.
Сепак, бугарската министерка за надворешни работи Велислава Петрова-Чамова се изјасни против ваквите акции, оценувајќи ги како контрапродуктивни и непотребна ескалација на односите меѓу двете земји.
Дополнително, бугарските европратеници испратија заедничко писмо до своите колеги во Европскиот парламент, во кое го осудија инцидентот и го оценија како чин мотивиран од омраза.
Според информациите од истрагата, осомничениот го признал делото, а надлежните институции продолжуваат со утврдување на сите околности поврзани со случајот.
