Во основното училиште „Александар Македонски“ во Реонскиот центар во општина Аеродром се работи на доградба на три нови училници, со што треба да се создадат услови за воведување едносменска настава за сите ученици.
Инвестицијата е поддржана од Министерството за образование и наука и е вредна 2,2 милиони денари. Предвидено е градежните активности да завршат во рок од три месеци. Денеска увид во работите извршија министерката за образование и наука Весна Јаневска и градоначалникот на Општина Аеродром, Дејан Митески.
Јаневска истакна дека воведувањето едносменска настава е приоритет во училиштата каде што постојат услови за тоа, посочувајќи дека овој модел носи повеќе придобивки за учениците и училиштата.
„Две години се заложуваме за воведување едносменска настава во сите општини и училишта каде што тоа е возможно. Придобивките се повеќекратни – децата ја започнуваат наставата наутро, кога се поконцентрирани за учење, подолго остануваат во училиштето и имаат повеќе можности за социјализација“, рече Јаневска.
Таа информираше дека концептот досега го прифатиле повеќе од 200 училишта, а Владата продолжува да ги поддржува општините преку проширување на капацитетите на постојните училишни објекти.
Во моментов се инвестира во доградба на училници во шест училишта, додека паралелно се подготвуваат уште 15 проекти за проширување на капацитетите во други училишта. Според најавите, дел од активностите на терен треба да започнат од ноември годинава, а сите проекти да бидат започнати до пролетта следната година.
Градоначалникот Митески информираше дека училиштата во Аеродром се подготвуваат за почетокот на новата учебна година. Учебниците за сите ученици се пристигнати и ќе бидат поделени на првиот училишен ден.
Четвртоодделенците и оваа година ќе добијат таблет-уреди, кои локалната самоуправа ги обезбедува од општинскиот буџет.
