По повеќе од една година бегство, утрово на органите на прогонот им се предаде поранешниот директор на Државната лотарија, Перпарим Бајрами, кој е обвинет за злоупотреба на службената положба и овластување и проневера поврзана со работењето на државната компанија.
Бајрами во 05:35 часот самоволно и пеш се пријавил кај надлежните органи. По него претходно беше распишана мерка „апси“ по барање на СМПС – Одделение за потраги, согласно со член 354 став 5 од Кривичниот законик.
Откако мерката била потврдена, Бајрами бил лишен од слобода и бил спроведен во КПУ Затвор Скопје.
Бајрами е првообвинет во случајот поврзан со Државната лотарија, во кој се обвинети и поранешниот прв вицепремиер Артан Груби и уште шест лица. Обвинителството ги товари за злоупотреби и проневера на околу 9,7 милиони евра од државната компанија.
Судската постапка против Бајрами започна во негово отсуство.
Со неговото предавање, по Артан Груби, уште едно лице кое повеќе од една година беше во бегство сега е достапно за надлежните институции.
Судењето за случајот „Државна лотарија“ продолжува во петок.
