Во Министерство за енергетика, рударство и минерални суровини се одржал ресорски состанок на кој биле разгледани тековните активности и проектите во енергетскиот сектор, со фокус на регионалното поврзување и стабилноста на системот.
На состанокот присуствувале претставници на ЕСМ, МЕПСО, НОМАГАС и МЕМО, кои ги презентирале актуелните проекти и планови.
Министерката Сања Божиновска нагласила дека клучен приоритет останува одржувањето на стабилен и сигурен енергетски систем, навремената реализација на проектите и исполнувањето на обврските од Реформската агенда.
Во соопштението се наведува дека Европска комисија ставила на располагање 65,7 милиони евра за Македонија во рамки на Планот за раст за Западен Балкан, оценувајќи ја земјата како најнапредна во спроведувањето на реформската агенда.
Од ЕСМ информирале дека се реализираат активни проекти од листата на јавни инвестиции, при што бил презентиран и позитивен финансиски резултат за првиот квартал.
МЕПСО, пак, информирал за инфраструктурните проекти како Битола–Елбасан, ТС Охрид и East-West Corridor, како и за добивка во првиот квартал од 2026 година.
Од НОМАГАС посочиле дека се работи на повеќе делници од националната гасоводна мрежа, меѓу кои Клечовце–Неготино, Неготино–Битола и Скопје–Тетово–Гостивар, како и на гасниот интерконектор со Грција.
МЕМО информирал дека се очекува поврзување со ЕУ зоната преку меѓусебно признавање на гаранциите за потекло и активности за пазарно спојување.
Од Министерството порачаа дека ќе продолжат активностите за обезбедување стабилен и сигурен енергетски систем.
