Тројца државјани на Судан биле откриени при детална царинска контрола на камион со стока пријавена за увозно царинење, соопшти Царинската управа.
Царинските службеници од Царинската испостава Скопје 1 при Царинарница Скопје ги пронашле лицата скриени помеѓу кутиите во товарниот дел на камионот.
Стоката била со потекло од Кина, а била натоварена во пристаништето во Солун, по што камионот бил пломбиран со грчка царинска пломба.
Според Царинската управа, тројцата државјани на Судан ја скинале сајлата во предниот дел од товарниот простор и се скриле меѓу кутиите со стока.
Пронајдените лица биле предадени на Министерството за внатрешни работи за понатамошно постапување.
Од Царинската управа посочуваат дека ова е четврти случај на откриени илегални мигранти во последните три месеци, што, како што наведуваат, ја потврдува засилената контрола и заложбите за спречување на нелегалниот транспорт на лица.
