Стратешкиот руски надзвучен бомбардер Ту-22М3 се урна во близина на местото Свиск во Иркутската област, на истокот на Русија, само неколку часа по еден од најмасовните воздушни напади врз Украина од почетокот на војната.
Според првичните информации, станува збор за авион кој учествувал во нападите врз украинските градови и од кој биле лансирани ракети во текот на ноќта.
Русија изминатата ноќ изврши жесток комбиниран напад врз Украина со ракети и беспилотни летала од различни типови. Главна цел беше Киев, а силни удари беа регистрирани и во Днипро и Харков.
Според украинските воздухопловни сили, биле забележани вкупно 681 воздушно средство – 70 ракети и 611 беспилотни летала.
Меѓу употребеното оружје имаше шест ракети „Циркон“, 34 балистички ракети „Искандер-М“ и С-400, како и 30 крстосувачки ракети Х-101/„Искандер-К“. Покрај тоа, Русија лансираше и стотици дронови, вклучувајќи „Шахед“, „Гербера“, „Италмас“, но и дронови-мамки наменети за збунување на противвоздушната одбрана.
Украинската армија соопшти дека успеа да пресретне или неутрализира 632 воздушни цели – 50 ракети и 582 беспилотни летала. Сепак, дел од проектилите ја пробија одбраната и погодија цели на 42 различни локации.
Најтешки последици се забележани во Харков, каде што петмина украински спасувачи загинаа при втор ракетен удар додека интервенираа на место погодено во претходниот напад.
Во Киев, меѓу оштетените објекти се наоѓаат станбени згради, музејскиот комплекс „Арсенал“, како и историскиот Успенски храм, кој се наоѓа под заштита на УНЕСКО.
