Сè уште се трага по 27-годишниот Шемо Шабани од Гостивар, кој исчезна пред речиси еден месец

Семејството на 27-годишниот Шемо Шабани од Гостивар речиси еден месец нема никакви информации за неговото исчезнување. Тој последен пат бил виден на 13 октомври, кога го напуштил семејниот дом, по што не се вратил. Досегашните полициски активности и теренски пребарувања не довеле до негово пронаоѓање.

— реклама —

Во потрагата била вклучена и Дирекцијата за заштита и спасување. На 21 октомври, нејзини екипи, заедно со полицијата и локалните служби, го пребарувале коритото на реката Вардар во Гостиварско. Припадниците на Тимот за брз одговор за спасување на води проверувале повеќе критични локации, почнувајќи од градското подрачје и продолжувајќи низводно.

— реклама —

И покрај деталното пребарување на десетина места во реката, следниот ден било потврдено дека Шабани не е пронајден. За потребите на потрагата било побарано и намалување на нивото на Вардар.

Паралелно, полицијата презела и други истражни активности. На разговор биле повикани лица кои имале контакт со исчезнатиот пред да му се изгуби трагата, а биле прегледувани и снимки од безбедносни камери и податоци за неговото движење.

— реклама —

Фотографијата на Шемо Шабани е објавена на официјалната интернет-страница на Министерството за внатрешни работи, во регистарот на исчезнати лица.

— реклама —

Од граѓаните кои располагаат со информации што би можеле да помогнат во потрагата се бара да ги споделат со полицијата во најблиската полициска станица.