Седум активни пожари, огнот зафатил и борова и мешана шума

Седум пожари на отворен простор се активни низ земјава утрово, додека еден пожар е ставен под контрола, а 16 се изгаснати, информира Центарот за управување со кризи (ЦУК).

— реклама —

Според податоците до 07:30 часот, во периодот од 30 до 31 август се регистрирани вкупно 24 пожари на отворен простор.

Активни пожари има во седум општини. Во Општина Ресен пожарот се шири на потегот Бела Црква–Подмочани, каде се зафатени борова шума и ниска вегетација. Активен пожар има и на потегот Копаница–Радуша во Општина Сарај, каде гори нискостеблеста шума и ниска вегетација.

— реклама —

Пожар е активен и над селото Палиград во Општина Зелениково, каде е зафатена мешана шума, како и над Нежилово во Општина Чашка, на местото Сватови, каде гори ниска вегетација и поединечни дрвја.

— реклама —

Во Општина Боговиње активен е пожар во селото Урвич, каде е зафатена нискостеблеста вегетација. Пожар има и во селото Градец, Општина Врапчиште, каде гори борова шума, како и во селото Драгов Дол во Општина Македонски Брод, каде се зафатени ниска вегетација и шума.

Пожарот кај селото Трново во Општина Гостивар, кој се шири кон селата Битово, Заград и Страјане во Општина Македонски Брод, е ставен под контрола. Таму се зафатени нискостеблеста шума, ниска вегетација, пасишта и папрат.

Во текот на ноќта и утрото се изгаснати 16 пожари на отворен простор во повеќе општини, меѓу кои Илинден, Ѓорче Петров, Прилеп, Долнени, Ресен, Богданци, Струга, Делчево, Старо Нагоричане, Јегуновце, Тетово, Брвеница, Врапчиште и Маврово-Ростуште.