Седуммина приведени за безобѕирно возење, меѓу нив четворица малолетници

Во текот на изминатите 24 часа, полициските службеници на повеќе локации низ државата лишиле од слобода седум лица поради безобѕирно управување со моторни возила. Најголем дел од нив биле затекнати зад волан без возачка дозвола, а меѓу приведените има и четворица малолетници.

— реклама —

Според информациите од Министерството за внатрешни работи, во Тетово биле запрени двајца малолетници кои управувале мопед и патничко возило без да поседуваат возачка дозвола. Исти прекршоци биле евидентирани и во Кочани и Кичево, каде малолетници управувале мопеди без положен возачки испит.

— реклама —

Полицијата санкционирала и возач во Куманово кој управувал возило без дозвола, како и лице во Кавадарци кое возело мотоцикл без соодветна документација.

Во Битола, пак, бил лишен од слобода возач на трактор кај кого биле измерени 1,77 промили алкохол во крвта. Тој учествувал во сообраќајна незгода со патничко возило, при што била причинета материјална штета.

— реклама —

Од МВР најавуваат дека по целосното расчистување и документирање на сите случаи ќе бидат поднесени соодветни кривични пријави.

Воедно, од Министерството апелираат до граѓаните да не управуваат возила без возачка дозвола, под дејство на алкохол или во период кога им е изречена забрана за управување, со цел зголемување на безбедноста во сообраќајот.