„Сега Муцунски се занимава со полиција откако Тошковски беше задолжен за хиперхлорирање“, велат од СДСМ

СДСМ преку соопштение ја обвини Владата дека во услови на повеќе здравствени и еколошки проблеми во земјава, министрите се занимаваат со прашања надвор од нивните ресори.

Од опозициската партија посочуваат дека граѓаните се соочуваат со последици од небезбедна вода во повеќе од 50 населени места, загадени реки и појава на западнонилска треска.

— реклама —

Според СДСМ, додека премиерот Христијан Мицкоски е отсутен, министерот за внатрешни работи Панче Тошковски претходно бил задолжен за хиперхлорирањето на водата во Гостивар и чистењето на водоводната мрежа.

Во меѓувреме, велат од партијата, министерот за надворешни работи Тимчо Муцунски излегува со информации поврзани со полициските постапувања околу ширењето на непроверени тврдења за безбедноста на водата во Скопје.

— реклама —

„Сега Тимчо Муцунски – министер за надворешни работи се занимава со полиција. Тој кажува колку луѓе биле повикани на разговор во полиција за шпекулациите и лажните информации за водата во Скопје“, велат од СДСМ.

— реклама —

Од опозициската партија прашуваат каде е Тошковски и дали презема активности во рамките на својата надлежност.

СДСМ оценува дека ваквата состојба дополнително ја намалува довербата на граѓаните во институциите, особено во ситуации кога, како што наведуваат, реакциите доцнат, а информациите не се навремено споделуваат со јавноста.

— реклама —

„Во ВМРО – ОКГ сите се занимаваат со туѓа работа, само не со својата. Како луѓето да имаат доверба?“, прашуваат од СДСМ.

Од партијата ја обвинија Владата на Мицкоски за „тотален институционален распад“ и порачаа дека последиците од, како што велат, нефункционирањето на институциите ги чувствуваат граѓаните.