Серафимовски: Грижата за пчелите е грижа за иднината на македонското земјоделство

Со промоција на пчеларството и македонскиот мед во Радовиш започна манифестацијата „Меден Радовиш 2026“. Настанот го отвори министерот за земјоделство, шумарство и водостопанство, Борче Серафимовски, кој порача дека во секоја тегла мед се соединети природата, трудот на пчеларите и карактерот на поднебјето.

— реклама —

Серафимовски истакна дека значењето на пчеларството не се сведува само на производството на мед и други пчелни производи. Според него, пчелите преку опрашувањето имаат незаменлива улога во овоштарството, градинарството и поледелството, поради што нивната заштита е важна за зголемување на домашното производство на храна и зачувување на биолошката разновидност.

— реклама —

Тој посочи дека политиките во овој сектор се насочени кон поголема професионализација и модернизација на пчеларските стопанства, зачувување на автохтоната македонска медоносна пчела, подобро искористување на пчелната паша и создавање производи со поголема додадена вредност.

Министерот нагласи и дека институционално се засилуваат контролите на квалитетот, заштитата од нелојална конкуренција и надзорот над производите што се неправилно декларирани.

— реклама —

„Македонскиот мед има потенцијал да биде високо вреднуван производ. Неговата вредност и понатаму ќе ја надградуваме преку проверен квалитет, препознатливо потекло, современо пакување и посилно присуство на домашниот и странските пазари“, порача Серафимовски.

Тој додаде дека чесните пчелари што произведуваат вистински и квалитетен мед треба да бидат препознаени и заштитени, бидејќи грижата за пчелите, како што истакна, е и грижа за иднината на македонското земјоделство.