Серафимовски: Обезбедени 450.000 вакцини против сипаници за овци и кози

Министерот за земјоделство, шумарство и водостопанство, Борче Серафимовски, информира дека се обезбедени 450.000 вакцини против сипаници кај овците и козите од Европската Унија, за кои е добиена и дозвола за употреба.

— реклама —

Серафимовски најави дека во текот на следната недела ресорното министерство ќе одржи средба со претставниците на сточарите, на која ќе се разговара за следните чекори и можноста за спроведување вакцинација на добитокот.

Министерот информираше и дека е изготвена методологија за обештетување на сточарите чии овци угинале од сипаници. Според него, бројот на угинати овци се приближува до 10.000 грла.

— реклама —

„Согласно правилата, на истото место најмалку шест месеци нема да може повторно да се чува добиток. Така што, ние ќе гледаме максимално што можеме да извршиме исплата кон сточарите за да може да се подготват за повторно набавување нови овци“, изјави Серафимовски.

— реклама —

Тој оцени дека состојбата со сипаниците кај овците се стабилизира и дека засега ширењето на болеста е ограничено на Источниот Регион, кој е еден од најпогодените.

Според министерот, сточарите ги почитуваат пропишаните мерки и ги изолираат стадата, што придонесува за намалување на бројот на заболени грла.

— реклама —

„Во координација со сточарите ќе се разгледуваат следните чекори за справување со болеста и ќе ја разгледаме можноста за вакцинација на добитокот во согласност со препораките на европските експерти“, изјави Серафимовски.