Состојбата со сипаниците кај овците и натаму е сериозна, а бројот на регистрирани жаришта во земјава достигна 64. Најголем број од нив се во Источниот регион, каде што се евидентирани 50 жаришта.
Според информациите што ги презентираше министерот за земјоделство, шумарство и водостопанство Борче Серафимовски, седум жаришта има во Североисточниот, шест во Вардарскиот и едно во Скопскиот регион.
Серафимовски апелираше до сточарите доследно да ги почитуваат мерките и препораките на надлежните институции, навремено да ги пријавуваат сомнителните случаи и да не користат заедничка опрема без претходна дезинфекција.
Како еден од главните ризици за ширење на болеста е издвоено стрижењето на овците со несоодветно дезинфицирани ножици, преку кои заразата може да се пренесе од едно на друго стадо.
Во меѓувреме, институциите работат на обезбедување вакцини преку Европската комисија, Турција и ФАО. Сепак, министерот појасни дека обезбедувањето вакцини не значи автоматски и започнување со вакцинација. Одлуката ќе биде донесена врз основа на стручна проценка на епидемиолошката состојба, ризикот и ветеринарно-здравствените и економските последици.
Сточарите чии стада се погодени од болеста ќе бидат обештетени. Во тек се проценките и подготовките за обезбедување средства, а моделот за обештетување веќе е утврден од Агенцијата за храна и ветеринарство.
Досега на терен се евидентирани околу 10.000 угинати овци. Серафимовски посочи дека дел од ширењето на болеста е поврзано и со непочитување на превентивните мерки.
„Шест месеци не е дозволено на истото одгледувалиште повторно да се внесе нов сточен фонд“, нагласи министерот.
Надлежните институции ја следат и состојбата во соседните земји поради можноста од појава на други заразни болести кај добитокот. Одржана е работна средба со надлежните институции во Србија за размена на информации и искуства, а се следи и состојбата во Грција.
„Засега најголем предизвик за нас остануваат сипаниците кај овците и правиме сè за да го амортизираме ударот и да спречиме натамошно ширење на болеста“, изјави Серафимовски.
