Министерот за земјоделство, шумарство и водостопанство Борче Серафимовски ги повика индиските компании да ги искористат можностите за инвестирање во македонското земјоделство, истакнувајќи дека политичките односи меѓу двете земји треба да се претворат во конкретна економска соработка и долгорочни партнерства.
Обраќајќи се на Македонско-индискиот бизнис-форум, кој се одржа во рамките на официјалната посета на претседателката на Индија, Драупади Мурму, на Македонија, Серафимовски оцени дека посетата претставува можност за отворање нови инвестиции и зајакнување на деловната соработка.
Тој нагласи дека сегашната трговска размена во земјоделството и прехранбената индустрија не ги одразува реалните можности на двете земји. Како области со најголем потенцијал за инвестиции ги посочи сточарството, производството и преработката на овошје и зеленчук, лозарството и винарството, органското производство, пчеларството, како и развојот на современи преработувачки капацитети и дистрибутивни центри.
Според Серафимовски, целта е македонското земјоделство да стане модерно, одржливо, технолошки напредно и извозно ориентирано, при што Индија ја гледа како значаен партнер во трансферот на технологии и знаење, развојот на преработувачката индустрија и отворањето нови пазари.
Министерот ги претстави и можностите за вложувања во паметни системи за наводнување, рационално управување со водните ресурси, современа земјоделска механизација, дигитализација на производството, соларни системи за фарми и производство на енергија од биомаса и биоотпад. Тој посочи дека компаниите кои ќе ги исполнат условите ќе можат да користат финансиска поддршка преку националните програми и програмата ИПАРД III.
Серафимовски порача дека Министерството за земјоделство, шумарство и водостопанство ќе биде активен партнер на заинтересираните инвеститори, обезбедувајќи директна комуникација со компаниите, поврзување со домашните производители и поддршка за реализација на инвестициските проекти.
