Серафимовски во Струмица: Министерството активно работи на стабилизирање на откупот на пиперката

Министерот за земјоделство, шумарство и водостопанство Борче Серафимовски денеска во Струмица одржа одделни средби со регистрирани откупувачи и со производители на пиперка, на кои се разговараше за тековниот откуп и предизвиците со кои се соочуваат двете страни.

— реклама —

На средбата со откупувачите биле разгледани динамиката на откупот, цените според класата и намената на производот, количините што можат да се преземат, извозните можности и навремената исплата кон земјоделците.

Серафимовски нагласил дека условите за откуп мора однапред да бидат познати, цените јавно објавени, а класификацијата да се спроведува прецизно и доследно.

— реклама —

На средбата со производителите, земјоделците ги изнеле своите забелешки за почетните откупни цени, производствените трошоци и штетите од временските непогоди врз годинашната реколта.

— реклама —

Министерот истакнал дека секој земјоделец има право неговите аргументи да бидат сериозно разгледани, додавајќи дека зад секој предаден килограм стојат вложен труд и егзистенцијата на едно земјоделско семејство.

Тој информираше дека Државниот инспекторат за земјоделство продолжува со секојдневни контроли на откупните пунктови, при што се проверуваат условите за работа, јавното истакнување на цените, класификацијата на производите, исправноста на мерните инструменти и документацијата. За секоја утврдена неправилност, како што посочи, ќе бидат преземени соодветни законски мерки.

— реклама —

Серафимовски најави и дека во текот на следната недела ќе се сретне со сопствениците на преработувачките капацитети, со цел да се разговара за капацитетите за откуп и можностите за пласман на годинашната реколта.