Шест месеци работа без плата и без продолжен договор, вработените од Детска клиника на протест

Околу 50 вработени во Клиниката за детски болести денеска протестираа пред Министерството за здравство, незадоволни што веќе шест месеци работат без плата и сè уште немаат продолжени договори за работа.

— реклама —

Тие велат дека, и покрај бројните реакции до надлежните институции и ветувањата дека ќе се направат напори за решавање на проблемот, нивниот статус останува нерешен. Вработените очекуваат средба со министерот за здравство, Азир Алиу, и итно решение за нивниот работен ангажман.

— реклама —

„Работевме шест месеци без ниту еден одговор. Одговорот од Министерството за финансии ни стигна дури во април, а ние за тие месеци чесно работевме и ѝ служевме на Клиниката и на децата. Пред два-три дена министерот изјави дека сме биле волонтери, а ние немаме ниту еден документ дека сме работеле како волонтери“, изјави Седат Буши, еден од вработените.

Тој посочи дека документацијата за продолжување на договорите била доставена уште во декември и се однесува на истите лица кои работеле и во претходните години.

— реклама —

„Не може до декември 2025 година да сме биле вработени и да земаме плата, а од јануари да бидеме волонтери. Тоа нема никаква логика. Минатата недела бевме во Министерството за финансии, каде што ни рекоа дека постапката ќе почне од почеток“, рече Буши.

Вработените предупредуваат дека нивната неизвесност директно влијае врз функционирањето на Клиниката и бараат надлежните институции што поскоро да најдат решение за проблемот.