Сестрата на Фросина по ослободителната пресуда за таткото на Васил Јованов: „Судот одбра да поверува на убедливо кажаната лага“

Росица Кулакова, сестра на трагично загинатата Фросина Кулакова, остро реагираше по ослободителната пресуда за Зоран Јованов, таткото на Васил Јованов, кој смртно ја прегази Фросина на булеварот „Партизански одреди“ во Скопје.

Во објава на социјалните мрежи, Кулакова постави низа прашања за кои, како што наведува, никој досега не дал разумен одговор.

„Ако таткото не знаел дека Васо ја вози колата, како е можно камерите собрани од Обвинителството да покажуваат дека истото возило Васо го управувал речиси секојдневно со месеци пред да ја убие Фросина, притоа константно возејќи со брзина поголема од пропишаната? Ако не знаел, тогаш како не забележал дека колата секојдневно исчезнува и се враќа? Ако знаел, тогаш зошто не го пријавил? Зошто не презел ништо за да го спречи?“, прашува таа.

Кулакова потсетува и на претходен сообраќаен инцидент во кој Васил Јованов учествувал со истото возило.

„Во претходен случај во кој Васо предизвикува сообраќајна несреќа со истото возило, ако не се лажам, во Радовиш, правичниот и строг господин – татко изјавил дека му го дал возилото на својот син. Во оваа постапка истиот татко одговорно тврди дека никогаш не му ја давал колата на Васо. И сега, која е вистината? Не може истовремено и двете. Вистината е една“, наведува таа.

Според неа, најзагрижувачка не е само пресудата, туку пораката што таа ја испраќа во јавноста.

„Судот денес одбра да поверува на убедливо кажаната лага наместо на тешката вистина. И тоа што најмногу загрижува не е само пресудата, туку пораката што ја испраќа. Дека родителот нема никаква одговорност ако со години гледа опасно однесување и не реагира? Дека е доволно да кажеш „не знаев“ и покрај сите околности што укажуваат на спротивното? Дека никој не треба да одговара за премолчувањето, игнорирањето и дозволувањето ризикот да расте сѐ додека некој не биде убиен?“, пишува Кулакова.

Таа оценува дека смртта на нејзината сестра не е резултат на момент на невнимание, туку на долгогодишен синџир на неодговорност.

„Фросина не загина поради една секунда невнимание. Нејзината смрт е резултат на еден долг синџир на неодговорност, толеранција и неказнивост што очигледно продолжува“, напиша Росица Кулакова, завршувајќи ја објавата со зборот: „Бљак!“.

Основниот кривичен суд претходно донесе ослободителна пресуда за Зоран Јованов. Во образложението беше наведено дека кривичната одговорност не може да се темели само на фактот што обвинетиот бил сопственик на возилото и што неговиот полнолетен син го управувал без возачка дозвола.

„Кривичното право почива врз начелото на лична и индивидуална одговорност, поради што последиците од самостојното постапување на едно полнолетно лице не можат автоматски да му се припишат на друго лице само поради роднинска врска или поради сопственост на возилото“, соопшти Судот.