Севернокорејскиот лидер Ким Џонг Ун соопшти дека Пјонгјанг продолжува со реализација на програмата за нуклеарно вооружување на морнарицата и најави изградба на нови воени бродови со депласман од 10.000 тони.
Изјавата била дадена за време на церемонијата за ставање во употреба на воениот брод „Чое Хјон“ во пристанишниот град Нампо, пренесе државната новинска агенција КЦНА. Станува збор за еден од двата разурнувачи од класата од 5.000 тони што Северна Кореја ги претстави минатата година.
„Програмата за опремување на морнарицата со нуклеарно оружје се реализира според планот. Тоа е стратешка насока од клучно значење, која ќе овозможи нашите нуклеарни сили да бидат подготвени за повеќекратни и ефикасни операции“, изјавил Ким.
Според севернокорејските медиуми, бродот „Чое Хјон“ е опремен со најсовремено оружје. Ким во неколку наврати годинава ги посетил бродовите од оваа класа, а во април лично надгледувал и тестирање на крстосувачка ракета лансирана од овој брод.
Севернокорејскиот лидер најавил дека по „Чое Хјон“ наскоро во оперативна употреба ќе биде воведен и разурнувачот „Канг Кон“, по што ќе следи изградба на стратешки воени бродови од 10.000 тони.
Според плановите на Пјонгјанг, земјата треба секоја година да произведува по два нови површински воени брода, поголеми од „Чое Хјон“, вклучително и крстосувачи со депласман од 10.000 тони.
На неодамнешниот пленум на владејачката партија, Ким најави дополнително јакнење на одбранбените капацитети, обвинувајќи ги Јужна Кореја и Соединетите Американски Држави дека со модернизацијата на своите армии го туркаат регионот „кон раб на нуклеарна војна“.
По неуспешниот самит меѓу Ким и американскиот претседател Доналд Трамп во Ханој во 2019 година, Северна Кореја повеќепати се прогласи за „неповратно“ нуклеарна држава. Земјата останува под меѓународни санкции поради својата нуклеарна програма, а двете Кореи и натаму формално се во воена состојба, бидејќи Корејската војна заврши со примирје, а не со мировен договор.
