Северна Кореја истрела неколку балистички ракети со краток дострел кон морето покрај својот источен брег, по што Јужна Кореја свика итен безбедносен состанок.
Според Здружениот генералштаб на јужнокорејските вооружени сили, проектилите биле лансирани од подрачјето на Вонсан околу 5:20 часот по локално време и прелетале приближно 250 километри.
Јужнокорејските и американските власти спроведуваат детална анализа на карактеристиките на проектилите.
„Јужнокорејските и американските разузнавачки служби од самиот почеток ги следеа лансирањата и разменуваа информации, а податоците за балистичките проектили беа споделени и со Јапонија“, соопшти јужнокорејскиот Генералштаб.
Јужнокорејската војска соопшти дека внимателно ги следи активностите на Северна Кореја и дека во рамките на заедничкиот одбранбен систем со САД ја одржува подготвеноста за одговор на евентуални нови провокации.
По лансирањето, Канцеларијата за национална безбедност на јужнокорејскиот претседател свика итен состанок со претставници на Министерството за одбрана, Генералштабот и други надлежни институции.
На состанокот биле разгледани можниот одговор на Владата и влијанието на последното ракетно тестирање врз безбедноста на Јужна Кореја. Сеул го повика Пјонгјанг веднаш да престане со лансирањето балистички ракети.
Американската Индопацифичка команда соопшти дека е запознаена со случувањата и дека е во тесна координација со сојузниците и партнерите во регионот. Според првичната американска проценка, проектилите не претставувале непосредна закана за американскиот персонал, територија или сојузниците.
Новото лансирање следува само еден ден откако Јужна Кореја, Јапонија и САД ги завршија заедничките воени вежби, насочени и кон проверка на подготвеноста за одговор на севернокорејските ракетни и нуклеарни закани.
Минатиот месец Северна Кореја истрела повеќе од десет балистички ракети со краток дострел и нареди нејзините вооружени сили да одржуваат целосна борбена готовност за време на заедничките американско-јужнокорејски вежби.
Американскиот претседател Доналд Трамп во меѓувреме го намали обемот на дел од воените вежби, кои ги опиша како непријателски кон Пјонгјанг, а најави и дека очекува средба со севернокорејскиот лидер Ким Џонг-ун подоцна годинава.
