Северна Кореја во неделата истрела два балистички проектили од своето источно крајбрежје, што е второ вакво тестирање за околу една недела. Лансирањата се случија неколку дена откако Пјонгјанг го обвини Вашингтон за зголемување на тензиите на Корејскиот Полуостров со воени вежби.
Првиот проектил бил истрелан од областа на пристанишниот град Вонсан околу 15 часот по локално време и летал околу 450 километри, а јужнокорејската војска претпоставува дека станува збор за ракета од типот „Хвасонг-11“.
Околу три часа подоцна бил истрелан уште еден балистички проектил со краток дострел, кој според подоцнежните информации летал повеќе од 600 километри.
Јапонското Министерство за одбрана соопшти дека првиот проектил паднал во близина на ексклузивната економска зона на Јапонија.
Јужнокорејскиот Совет за национална безбедност го осуди лансирањето и го повика Пјонгјанг веднаш да престане со ракетните активности, оценувајќи дека тестирањата се спротивни на резолуциите на Советот за безбедност на Обединетите нации.
Реагираше и Јапонија, од каде што беше упатен дипломатски протест. Јапонскиот министер за одбрана Шинџиро Коизуми изјави дека ваквите постапки на Северна Кореја ја загрозуваат безбедноста на Јапонија, регионот и меѓународната заедница.
Новото лансирање доаѓа во период на зголемени тензии околу севернокорејската нуклеарна програма. Пјонгјанг неодамна ја осуди и поморската воена вежба предводена од САД, во која учествуваа Јужна Кореја и Јапонија.
Ким Јо-џонг, сестрата на севернокорејскиот лидер Ким Џонг-ун, ги обвини САД за зголемување на тензиите и порача дека Пјонгјанг нема да се откаже од намерата да го зајакнува својот нуклеарен арсенал.
