Северна Кореја истрела повеќе балистички проектили кон исток, соопшти јужнокорејската новинска агенција Јонхап, повикувајќи се на воени извори. Инцидентот беше потврден и од јапонски извори, кои наведуваат дека станува збор за ново лансирање во рамки на засилената воена активност на Пјонгјанг.
Според достапните информации, ова е седмо лансирање на балистички проектили од почетокот на годината и четврто само во април, што укажува на забрзување на ракетната програма на Северна Кореја.
Експертите оценуваат дека Пјонгјанг ја користи актуелната геополитичка состојба, особено фокусот на САД кон Блискиот Исток, како можност за унапредување на своите нуклеарни и ракетни капацитети.
Ваквите тестирања се спротивни на резолуциите на Советот за безбедност на Обединетите нации, кои го ограничуваат развојот на балистичко оружје. Сепак, севернокорејските власти ги отфрлаат овие ограничувања, повикувајќи се на своето право на самоодбрана.
