Севернокорејскиот лидер Ким Џонг Ун изјави дека употребата на вештачка интелигенција е „најголем приоритет“ во модернизацијата на сè пософистицираното оружје на земјата и во развојот на дроновите, пренесе државната агенција KCNA.
За време на вчерашната посета на комплекс за беспилотни летала во Пјонгјанг, Ким присуствувал на тестирање на повеќенаменски дронови и извидувачки летала. KCNA објави и фотографии од дронови со значителни димензии.
Ким потенцирал дека „брзиот развој на новововедени технологии на вештачка интелигенција“ е клучен за зголемување на борбените капацитети на војската и повикал на „проширување и засилување на сериското производство на дронови“.
Посетата следува само една недела откако севернокорејскиот лидер го надгледуваше тестот на нов мотор на цврсто гориво за интерконтинентални балистички ракети, што го оцени како „значително“ зголемување на нуклеарните способности на земјата.
Според американската Одбранбена разузнавачка агенција (DIA), Северна Кореја располага со балистички и крстосувачки ракети опремени со нуклеарни боеви глави, зголемени нуклеарни резерви и почетна програма за шпионски сателити. Војската брои околу еден милион активни војници, со повеќе од седум милиони резервисти – во земја со население од приближно 25,6 милиони жители.
Иако точната состојба на развојот на вештачката интелигенција во Северна Кореја е непозната, аналитичкиот центар 38 North во извештај посочува дека Пјонгјанг, и покрај санкциите, соработувал во истражувања со академици од САД, Кина и Јужна Кореја, што укажува на „значителни напори“ за приближување до глобалната трка во оваа област. Во најголем дел тие напори се потпираат на Кина, еден од водечките актери во светот во оваа сфера.
Паралелно, Северна Кореја постепено ги зајакнува и врските со Русија. Минатата година, Ким и рускиот претседател Владимир Путин потпишаа договор за меѓусебна одбрана, што предизвика загриженост на Западот.
Германски аналитички институт неодамна објави дека Пјонгјанг испорачал речиси 10 милијарди долари вредно оружје и десетици илјади војници за потребите на војната во Украина, а за возврат добил помош од 457 милиони до 1,19 милијарди долари – главно во храна, гориво, системи за противвоздушна одбрана, па дури и можеби борбени авиони.
фото: KCNA
