Северна Кореја ја осуди одлуката на Соединетите Американски Држави да ѝ одобрат на Јужна Кореја можна продажба на ракети и друга воена опрема, оценувајќи дека Вашингтон зазема „отворено непријателски став“ кон Пјонгјанг.
Севернокорејската државна агенција KCNA ја пренесе изјавата на портпарол на Министерството за надворешни работи, според која Пјонгјанг ќе одговори „сериозно, веднаш и силно“ на, како што ги нарекува, непријателските постапки на САД.
Реакцијата следува во период кога американскиот претседател Доналд Трамп повторно го повикува севернокорејскиот лидер Ким Џонг-ун на средба. Трамп претходно овој месец изјави дека Ким одговорил на неговиот предлог, но аналитичарите оценуваат дека официјален Пјонгјанг засега не покажува голем интерес за продолжување на преговорите.
Северна Кореја особено ја критикува одлуката на американскиот Стејт департмент за можна продажба на тактички ракети AIM-9X „Сајдвиндер“ и придружна опрема на Јужна Кореја. Вредноста на потенцијалниот договор е проценета на 125 милиони долари, а Пјонгјанг го смета за нова закана за сопствената безбедност.
Севернокорејските власти го критикуваа и американскиот план за финансирање на документирањето на состојбата со човековите права и собирањето информации за Северна Кореја. Според Пјонгјанг, станува збор за дел од кампања чија цел е дестабилизација на севернокорејскиот општествен систем.
Портпаролот посочи дека Вашингтон годинава веќе одобрил продажба на различни видови оружје за Јужна Кореја, меѓу кои напредни тактички ракети, воени и јуришни хеликоптери и прецизни бомби.
Според Северна Кореја, со тоа САД го поттикнуваат Сеул дополнително да ги зајакнува своите воени способности. Пјонгјанг предупреди дека забрзаното воено поврзување на САД со нивните сојузници во азиско-пацифичкиот регион може негативно да влијае врз регионалната безбедност.
„Не можеме да го занемариме негативното влијание на американската продажба на оружје на Република Кореја врз регионалната безбедност“, порача севернокорејскиот претставник.
Тој додаде дека Северна Кореја е свесна за, како што ги оценува, заканите и дека на „непријателските постапки во различни области“ ќе одговори „сериозно, веднаш и силно“.
