СДСМ повторно побара од Владата и здравствените институции да го објават целосниот извештај за квалитетот на водата во Гостивар, тврдејќи дека шест недели по почетокот на проблемот јавноста сè уште нема увид во целосна, потпишана анализа.
Од партијата ги обвинуваат премиерот Христијан Мицкоски и министерот за здравство Сашо Клековски дека со необјавувањето на документот ја зголемуваат неизвесноста и недовербата кај граѓаните.
„Поминаа цели шест недели, а документ со целосна, јавна и потпишана анализа за водата во Гостивар сè уште нема. Зошто не се објавува целосен извештај? Што се крие од граѓаните?“, прашуваат од СДСМ.
Според партијата, во изминатиот период од институциите доаѓале различни и, како што оценуваат, противречни пораки – најпрво забрани за користење, потоа дозвола водата да се употребува како техничка, потоа информации за нови бактерии и вируси, а на крај и уверувања дека водата може да се пие.
СДСМ тврди дека и покрај тоа што водата се испитува секојдневно, јавноста досега не добила целосен документ со сите резултати.
„По 22 дена загадена вода и околу 5.000 заболени, граѓаните треба да видат целосен документ бидејќи водата за пиење е прашање на јавно здравје“, наведуваат од партијата.
Оттаму бараат да бидат објавени сите мостри, сите лабораториски анализи, датумите на земање примероци, утврдените бактерии и нивните вредности, како и податоците за институциите што ги спроведувале испитувањата.
„И најважното – кој, врз основа на кои резултати и со чиј потпис утврдил дека водата е безбедна за пиење?“, прашуваат од СДСМ.
Станува збор за политичко соопштение на СДСМ и нивни тврдења и оценки за постапувањето на институциите во случајот со водата во Гостивар.
