Шест пожари се активни низ земјава, гори и букова шума во Кичевско

На територијата на земјава до 13 часот денеска се регистрирани вкупно 10 пожари на отворен простор, од кои шест сè уште се активни, еден е ставен под контрола, а три се целосно изгаснати, информира Центарот за управување со кризи (ЦУК).

— реклама —

Активни пожари има во шест општини. Во Прилепско гори ниска вегетација во атарот на село Чаниште, во правец кон Крушевица, Лопатица и Дуње, како и кон Црна Река.

Во Студеничанско, пожарот на потегот Моране – Вртекица – Рамни Габер има зафатено мешана шума. Во Македонски Брод гори во месноста Видуш, кај селата Драгов Дол и Локвица, каде што се зафатени ниска вегетација, нискостеблеста шума и грмушки.

— реклама —

Пожар е активен и во Кичевско, во атарот на село Тајмиште, во месноста Дарда, каде што гори високостеблеста букова шума. Во Липковско, пак, пожарот во атарот на Никуштак зафатил ниска вегетација и шума.

— реклама —

Во Крушевско повторно се активирал пожарот во реонот на село Белушино, во правец кон Јакреново, но пожарот е ставен под контрола. Зафатени се ниска вегетација и дабова шума.

Еден пожар е под контрола во Делчево, каде што гори на градската депонија.

— реклама —

Во текот на денот се изгаснати три пожари. Во Гостиварско пожарот кај село Форино зафатил ниска вегетација, во Желино кај село Церово гореле ниска вегетација и папрат, додека во Могила, кај село Мусинци, бил изгаснат пожарот на ниска вегетација.