Претседателот на Србија, Александар Вучиќ, добил писмо од кинескиот претседател Си Џинпинг, во кое кинескиот лидер ја нагласува важноста на односите меѓу двете земји и упатува пофалби за српскиот претседател по неговата неодамнешна посета на Кина.
Во писмото, Си Џинпинг посочува дека за време на средбите бил постигнат широк консензус за натамошно продлабочување на соработката меѓу Кина и Србија и за продолжување на изградбата на заедница со заедничка иднина меѓу двете држави.
„Срдечно разговаравме за пријателството меѓу Кина и Србија, разменивме мислења за управувањето со државата и за меѓународната ситуација. Вашата одговорност кон земјата и народот длабоко ме импресионираше“, наведува Си Џинпинг во писмото.
Кинескиот претседател потсетува и на Орденот на пријателството што му бил доделен на Вучиќ, оценувајќи дека тоа е симбол на долгогодишното пријателство меѓу двете земји и потврда за напредокот во билатералните односи.
Си Џинпинг истакнува дека придава големо значење на развојот на кинеско-српските односи и изразува подготвеност за редовна комуникација со Вучиќ, со цел натамошно унапредување на соработката и реализација на нови заеднички проекти.
На крајот од писмото, кинескиот претседател му посакува добро здравје и успех во работата на Вучиќ, како и просперитет, напредок, мир и благосостојба за Србија и нејзините граѓани.
