Сиљановска-Давкова до бруцошите: Вреди да се студира, предава и живее на УКИМ, како заеднички дом на професорите и на студентите

Претседателката Гордана Сиљановска-Давкова денеска се обрати на свеченоста по повод почетокот на новата академска 2026/2027 година на Универзитетот „Св. Кирил и Методиј“ во Скопје.

Таа им порача на бруцошите да учат уште од првиот академски ден, да развиваат критички ум, да ги бранат принципите и вредностите.

— реклама —

За неа, универзитетот, кој не случајно ужива автономија, треба да воспитува млади луѓе, способни самостојно да размислуваат и храбро да им се спротивстават на неправдата, лагата и силата, како што Фокнер ги советуваше студентите.

Со длабока убеденост дека вештачката интелигенција треба да му служи на човекот, а не да го замени, таа укажа на вредноста на природната и емоционалната интелигенција.

— реклама —

Сиљановска-Давкова ги охрабри студентите да не бидат енциклопедии што меморираат, туку да го вежбаат умот, развивајќи оригинални идеи, а знаењето да го ставаат во функција на општото добро.

Според неа, УКИМ, како најстар и најдобар универзитет во земјата, мора да биде предводник во промените и развојот на општеството, потпирајќи се на својот научен и интелектуален потенцијал, врзан за генерации дипломирани, магистрирани и докторирани студенти.

— реклама —

Таа посочи на итноста од посебна грижа и ангажирање на македонскиот научен потенцијал, распослан ширум светот, во трасирањето на патот кон иднината.

Претседателката ги охрабри студентите да останат бунтовни со причина, да прашуваат и да оспоруваат, а професорите да не забораваат дека, покрај градењето академски кариери, мора да се посветат на педагошката работа со студентите.

Поучена од студентското и професорското искуство на УКИМ, таа им порача дека вреди да се студира, предава и живее на УКИМ, како заеднички дом на професорите и на студентите.

На свеченоста свои обраќања имаа и министерката за образование и наука, проф. д-р Весна Јаневска, ректорката на УКИМ, проф. д-р Биљана Ангелова, и претседателката на Универзитетското студентско собрание, Ангела Василевска.