Сиљановска – Давкова ја одликуваше Светлана Мојсов со Орден „8 Септември“

Претседателката Гордана Сиљановска-Давкова денеска во „Вила Водно“ ѝ го врачи Орденот „8 Септември“ на Светлана Мојсов за нејзиниот исклучителен придонес во биохемијата и светската наука.

Мојсов, која е родена во Скопје, со емоции го прими високото државно признание.

— реклама —

„Јас сум без зборови. Многу Ви благодарам“, рече таа.

— реклама —

Сиљановска-Давкова истакна дека Мојсов, иако својата научна кариера ја изградила во САД, е Македонка родена во Скопје и со своето дело придонела за афирмација на македонската наука во светски рамки.

Мојсов дипломирала физичка хемија на Природно-математичкиот факултет во Белград, а докторирала на Рокфелеровиот универзитет во Њујорк под менторство на нобеловецот Брус Мерифилд. Нејзината долгогодишна научно-истражувачка работа е поврзана со синтезата на пептиди и истражувањата значајни за развојот на биохемијата.

— реклама —

Таа е добитничка на бројни меѓународни научни признанија, а во 2023 година беше прогласена и за една од 10-те највлијателни научници на годината од списанието „Nature“. Во 2024 година доби повеќе значајни меѓународни награди за својот придонес во биомедицината.

„Со ова највисоко државно одликување – Орденот „8 Септември“ – ѝ оддаваме признание и благодарност за нејзиниот фундаментален придонес кон развојот на македонската наука во светски рамки, но и кон македонската афирмација во највисоките меѓународни интелектуални кругови“, истакна Сиљановска-Давкова.

Мојсов во земјава ја доби и Светската награда на хуманизмот на градот Охрид, прогласена е за почесен професор на Универзитетот „Американ колеџ“ во Скопје, а предложена е и за почесен професор на Универзитетот „Св. Кирил и Методиј“ и за почесен член на МАНУ.