Сиљановска-Давкова му понуди помош на Радев: Македонија подготвена да помогне по поплавите во Бугарија

Македонија е подготвена да даде поддршка во справувањето со последиците од катастрофалните поплави во Бугарија – ова го соопшти бугарскиот претседател Румен Радев по телефонскиот разговор со претседателката Гордана Сиљановска-Давкова.

— реклама —

„Ѝ се заблагодарувам на претседателката Гордана Сиљановска-Давкова за конструктивниот разговор и изразеното сочувство за жртвите од поплавите во Бугарија, како и за понудената подготвеност на Македонија да помогне во надминување на последиците од катастрофата,“ изјави Радев.

— реклама —

Разговорот се одржа во момент кога Бугарија се соочува со интензивни врнежи и сериозни поплави, кои зафатија повеќе региони во земјата. Дел од населението остана без електрична енергија, а пристапот до најпогодените подрачја е и понатаму ограничен.

— реклама —

Според последните информации од бугарските медиуми, поплавите однесоа четири човечки животи.

Во погодените области и натаму траат акциите за спасување и расчистување, во кои учествуваат волонтери, припадници на армијата и службите за итни интервенции, со цел што поскоро да се обнови нормалното функционирање и да се обезбеди безбедност за жителите.