Претседателката Гордана Сиљановска-Давкова нема да го користи револверот што како дипломатски подарок го добила од турскиот претседател Реџеп Таип Ердоган, ниту ќе има каков било контакт со него, потврдија од нејзиниот Кабинет.
Оттаму информираат дека подарокот бил примен преку државниот протокол и дипломатска пошта и, согласно процедурите, ќе биде доставен во Скопје.
Од Кабинетот посочуваат дека револверот ќе биде соодветно евидентиран како службен предмет и со него ќе се постапува во согласност со Законот за оружје.
Потврдата следува откако турските медиуми објавија дека претседателот Ердоган на лидерите кои учествуваа на Самитот на НАТО им подарил гравиран револвер и кутија со муниција, што привлече внимание поради необичната природа на подарокот.
Сиљановска-Давкова присуствуваше на 36. Самит на НАТО, одржан на 7 и 8 јули во претседателскиот комплекс во Анкара, каде што вакви подароци им биле врачени на повеќе државни лидери.
Од Кабинетот нагласуваат дека револверот нема да биде во лична сопственост или употреба на претседателката, туку ќе биде третиран институционално, во согласност со важечките законски прописи. Засега не се соопштува каде ќе биде чуван откако ќе пристигне во Скопје.
