Силната бура го парализира аеродромот во Дубровник, авионите пренасочени во соседните земји

Силната бура предизвика сериозни нарушувања во авионскиот сообраќај на аеродромот „Руѓер Бошковиќ“ во близина на Дубровник, поради што голем број авиони не успеаја да слетаат и беа пренасочени кон аеродроми во соседните земји.

— реклама —

До 10 часот успешно слетале само три авиони – од Осло, Хелсинки и Брисел, додека останатите летови, по неуспешните обиди за слетување, биле пренасочени или откажани.

— реклама —

Причина за нарушувањата е силната бура со интензивни налети на ветер кои не им дозволуваат на пилотите безбедно да ги приземјат авионите.

— реклама —

„Точно е, ветерот од утринава ни создава големи проблеми. Поради силните налети на бурата, авионите едноставно не можат да слетаат. Повеќето се обидуваат, но кога тоа не успева, се пренасочуваат кон аеродроми во Италија, Црна Гора, Србија и други земји“, изјави портпаролката на аеродромот, Марина Русо.

— реклама —

Според временските прогнози, се очекува ветерот да ослабне во текот на денот, по што надлежните се надеваат дека авионскиот сообраќај ќе биде нормализиран во попладневните часови.