Силно невреме ја погоди Италија: одрони и поплави, илјадници домаќинства без струја

Силно невреме ја погоди централна и северна Италија по повеќенеделните екстремно високи температури, носејќи нагло заладување, обилни врнежи, одрони, поплави, прекини на електричната енергија и илјадници молњи. Најтешко се погодени Ломбардија и Тоскана, каде што на повеќе места беа прекинати патниот и железничкиот сообраќај, а некои населени места останаа отсечени.

— реклама —

Во Тоскана, невремето предизвика околу 18.000 удари на молња, а околу 6.000 домаќинства останаа без електрична енергија. Најголем број проблеми имаше во областите Маса Карара, Прато, Фиренца, Пистоја, Лука, Ливорно и Сиена. Силниот ветер корнеше дрвја и оштетуваше објекти, автомобили и инфраструктура. Во една од интервенциите повреден е пожарникар, кој бил пренесен во болница.

Особено сериозна е состојбата во Ломбардија. Обилните врнежи предизвикаа големи одрони, поради што шест општини во областа Бергамо останаа целосно отсечени. Од загрозените подрачја биле евакуирани околу 150 лица, додека од камп во Исола ди Фонда превентивно биле евакуирани меѓу 200 и 250 луѓе поради надојден водотек.

— реклама —

Во областа Бреша се евакуирани уште 81 лице. Бурата предизвика и уривање на мост, излевање на реката Ољо и прекин на железничкиот сообраќај на линијата Малоне-Едоло.

— реклама —

Невремето предизвика проблеми и во Лигурија, Пиемонт и Фриули-Венеција Џулија. Во Лигурија се регистрирани десетици илјади удари на молња, а силниот ветер оштети објекти и крајбрежни капалишта. Во Пиемонт, во близина на Торино, силното невреме урна ѕид и оштети паркирани автомобили.

Во Фриули-Венеција Џулија се регистрирани околу 1.500 удари на молња, а службата за итни случаи примила 135 повици за помош. Поплави биле пријавени во повеќе општини, додека на места ветерот достигнувал брзина од 90 километри на час.

Регионалните власти во Тоскана формирале кризен штаб, со приоритет повторно да се воспостават сообраќајот и основните услуги и да им се помогне на најпогодените локални заедници.