Тројца австриски државјани биле спасени рано утрово од спасувачки сплав на 12 наутички милји јужно од ’Ртот Камењак, откако нивната едрилица претрпела хаварија во силното невреме што го зафати Јадранот.
Во исто време, ненадејното поминување на фронт проследено со силен ветер предизвикало насукување на десетици пловила во подрачјето на островите Уније, Сусак и Лошињ. Во инцидентите немало повредени лица, соопшти Министерството за море, сообраќај и инфраструктура на Хрватска.
Националната централа за усогласување на трагање и спасување на море (MRCC Риека) добила повик за помош од едрилица во 4:44 часот. Поради лошите временски услови комуникацијата била отежната, но во соработка со Капетанијата на пристаништето Пула било утврдено подрачјето за потрага.
Во акцијата веднаш се вклучиле службеници на пулската капетанија, а биле известени и Поморската и аеродромската полиција во Пула, како и крајбрежната стража, чие пловило било ставено во подготвеност.
Преку крајбрежната радио-станица Риека-радио била испратена порака до сите пловила во истарското подрачје за зголемена внимателност.
Потрагата успешно завршила во 6:48 часот, кога службениците на капетанијата ги пронашле тројцата членови на екипажот. Австриските државјани биле неповредени и се наоѓале на спасувачки сплав покрај нивната едрилица.
Тие биле пренесени во Пула, додека едрилицата останала да плови на местото на несреќата. Бил организиран комерцијален транспорт на пловилото до безбедно пристаниште, каде ќе биде извршен увид за утврдување на причините за хаваријата.
Во текот на ноќта и раните утрински часови, MRCC Риека добила и повеќе пријави за насукување на пловила во подрачјето на островите Уније, Сусак и Мали Лошињ. Силниот ветер и брановите исфрлиле на брегот повеќе десетици чамци и јахти.
Службениците на Испоставата на капетанијата на пристаништето Мали Лошињ извршиле проверка на погоденото подрачје и утврдиле дека, освен материјална штета на пловилата, нема повредени лица ниту загадување на морето.
За поголемиот дел од насуканите пловила била организирана помош за нивно извлекување, додека за дел од нив ќе се погрижат сопствениците и компаниите за изнајмување пловила.
