ВМРО-ДПМНЕ преку соопштение упати нови критики кон раководството на Синдикатот на УПОЗ и Сојузот на синдикати на Македонија, обвинувајќи го претседателот на УПОЗ, Трпе Деаноски, за ненаменско трошење на средства собрани од синдикалните членарини.
Од партијата тврдат дека Деаноски, кој е и член на претседателството на ССМ, организирал четиридневни спортски игри во Чањ, Црна Гора, за кои биле потрошени околу 60.000 евра.
Според ВМРО-ДПМНЕ, на настанот учествувале привилегирани членови на синдикатот, а дел од членството изразило незадоволство поради тоа што не сите имале еднаква можност да бидат дел од спортските игри.
„Синдикатите постојат за заштита на работничките права, а не за членовите на претседателството на ССМ да се луксузираат на Јадранот на грбот на работниците кои плаќаат членарина“, наведуваат од ВМРО-ДПМНЕ.
Од партијата оценуваат дека раководството на ССМ се оддалечува од членството и наместо да се фокусира на заштита на работничките права, се занимава со активности кои, според нив, не се во интерес на работниците.
Во соопштението се додава дека ваквиот пристап придонесува за намалување на довербата и легитимитетот на синдикалните организации.
