Синдикатот на професионалните војници најави протест пред Владата: „Доста е од ветувања“

Незадоволството од состојбите во Армијата и нерешениот статус на професионалните војници по навршувањето на 45-годишна возраст го натера Независниот синдикат на професионални војници да најави протест пред Владата на 7 ноември, со почеток во 11 часот.

Синдикатот упати остри критики кон министерот за одбрана Владо Мисајловски, обвинувајќи го за неисполнети ветувања, манипулации и одолговлекување на решавањето на проблемите со кои се соочуваат припадниците на Армијата.

— реклама —

Претседателот на синдикатот, Александар Насковски, реагира на последната изјава на Мисајловски, во која министерот најавил решавање на статусот на професионалните војници и зголемување на платите од 1 јануари. Според синдикатот, станува збор за уште едно ветување што со месеци останува нереализирано.

„Денешната изјава, наводно спонтана, на министерот за одбрана Владо Мисајловски е класична лага и манипулација на јавноста, на професионалните војници и на припадниците на Армијата“, се наведува во соопштението.

— реклама —

Од синдикатот тврдат дека меѓу припадниците на Армијата министерот го добил прекарот „ЌЕ“, алудирајќи на честите најави за подобрување на условите што, според нив, не се исполнуваат.

— реклама —

Особено незадоволство предизвикува најавеното зголемување на платите од 1 јануари. Од синдикатот прашуваат зошто покачувањето не било реализирано порано, посочувајќи дека, според нивните тврдења, платите не биле зголемени во изминатите три години.

„Зошто од 1 јануари? Зошто не од утре поголеми плати? Иако знаеме дека цели три години платата не е зголемена ниту денар!“, прашуваат од синдикатот.

Дополнително, бараат објаснување зошто статусот на професионалните војници по навршувањето на 45-годишна возраст не бил решен во 2024 или 2025 година, ниту, како што наведуваат, до 16 октомври 2026 година.

Со најавениот протест, синдикатот го изразува незадоволството од досегашниот однос кон нивните барања и очекува решавање на прашањата што со години ги засегаат професионалните војници.