Првиот светски рекет Јаник Синер со голема почит зборуваше за Новак Ѓоковиќ во пресрет на нивниот полуфинален дуел на Вимблдон, истакнувајќи дека секој натпревар против српскиот тенисер е различен и носи нови предизвици.
Италијанецот рече дека искуството на Ѓоковиќ на тревната подлога и неговите успеси на Вимблдон го прават еден од најтешките можни противници.
„Ќе видиме што ќе се случи. Тој имаше тежок натпревар. Секој наш дуел е различен. Дури и кога имав неколку победи по ред против него, чувствував дека секој меч има своја приказна. Особено на подлога како тревата. Ако немате добар ден на сервис или не ја чувствувате добро топката, ќе биде многу тешко“, изјави Синер.
Тој додаде дека е среќен што повторно се пласирал во полуфиналето на Вимблдон и дека ќе се обиде да го даде својот максимум.
„Новак го има освоено овој турнир многупати и точно знае како треба да му пристапи. Со нетрпение го очекувам натпреварот“, истакна Италијанецот.
Синер се осврна и на своите настапи на турнирот, нагласувајќи дека сервисот му бил едно од најсилните оружја.
„Во клучните моменти сервирав добро и паметно. Имав мал пад на концентрацијата во вториот сет, но се обидував да останам максимално фокусиран во секој сервис-гем. Задоволен сум од начинот на кој ги одиграв важните поени, бидејќи по загубен сет сè може брзо да се промени. Против тенисери со силен сервис имате помала контрола врз играта, а токму тоа е нешто со што сум задоволен од мојот настап“, рече Синер.
Полуфиналниот натпревар меѓу Синер и Ѓоковиќ е закажан за денеска, со почеток околу 16:30 часот.
