Илјадници снимки направени на атракцијата „Ѓаволското тркало“ на минхенскиот Октоберфест со години се објавувале на интернет без согласност на жените кои се појавуваат на нив. Истражување на Баварскиот радиодифузен сервис (BR) открива дека дел од снимките собирале десетици милиони прегледи, а одредени содржини биле и продавани преку интернет.
На снимките често се гледаат жени во традиционални фустани, при паѓање или лизгање на атракцијата, а во дел од видеата се гледа и нивната долна облека. Содржините биле објавувани на платформи како Јутјуб, Инстаграм и ТикТок, често со сексуализирани наслови.
Новинарите на BR разговарале со жена која се појавила во еден од најгледаните видеозаписи, кој достигнал повеќе од 74 милиони прегледи. Таа раскажала дека по објавувањето на снимката била препознавана од мажи кои ѝ приоѓале токму поради видеото.
Според истрагата, зад дел од најгледаните снимки стоел маж од Баварија, со кого биле поврзани повеќе од десет профили на различни платформи. Содржините поврзани со тие профили пред нивното отстранување собрале стотици милиони прегледи.
Истражувањето открило и профил на жена од Горна Баварија, која во 2024 година навела дека за 18 дена на Октоберфест направила повеќе од 600 снимки. Според BR, дел од материјалот бил нуден и на продажба, при што за неколку стотици евра купувачите можеле да добијат повеќе од 500 необјавени видеа.
Во истрагата била откриена и мрежа на професионални креатори на содржини од Украина, кои користеле снимки од Октоберфест за зголемување на посетеноста на своите профили. Некои од спорните профили користеле и насловни фотографии составени од сцени од „Ѓаволското тркало“ и фотографии од порнографски содржини.
Дел од снимките биле нудени и преку групи на Телеграм. Во еден случај, корисник наводно барал шест евра за минута снимка на која се појавуваат само жени. По новинарските прашања, огласот бил отстранет.
По истрагата на BR, Гугл, Мета и ТикТок соопштиле дека отстраниле дел од спорните видеа и профили.
Организаторите на „Ѓаволското тркало“ наведуваат дека од 2024 година преземаат мерки против несоодветното снимање. На атракцијата се поставени известувања на германски и англиски јазик, а посетителите преку разглас се предупредуваат да не снимаат под облеката. Во случаи на сомнение, се повикува полицијата.
Во Германија од 2021 година е казниво снимањето интимни делови од телото под облеката без согласност, но истрагата укажува дека законската заштита не ги опфаќа сите ситуации. Особено проблематични се случаите кога камерата снима поширок кадар од атракцијата, без директно фокусирање на интимните делови од телото.
Дополнителен проблем претставуваат и сексуализираните содржини создадени со вештачка интелигенција. BR открил случаи во кои фотографии на жени биле обработувани со вештачка интелигенција за да изгледаат како да се без облека.
Германското Министерство за правда соопштило дека работи на измени на законодавството со кои би се опфатиле и воајерските снимки преку облеката, како и сексуализираните содржини создадени со вештачка интелигенција.
Предложените измени се во постапка на усогласување во рамки на сојузната влада.
