Топлотен удар во Скопје: Бетонот ја задржува жештината, улиците остануваат празни

Скопје деновиве се соочува со температури до 40 степени, а лекарите апелираат граѓаните да бидат особено внимателни и да избегнуваат изложување на високите температури и директното сонце во најтоплиот дел од денот.

Од Институтот за јавно здравје препорачуваат да се избегнува престој на отворено, работа и физичка активност од 11 до 17 часот, а особено внимание да посветат хронично болните, бремените жени и лицата над 65 години.

Д-р Давид Здравески од ИЈЗ советува клима-уредите да не се поставуваат на премногу ниска температура. Ако надвор е 39 степени, внатрешната температура треба да биде околу 25 степени за организмот полесно да се приспособи при излегување. За лицата кои работат на отворено се препорачуваат почести паузи, престој во сенка и доволен внес на течности.

— реклама —

„Доколку надворешната температура е над 35 степени, најдобро е да се престојува во климатизирани простории. Треба да се спуштат ролетните и прозорците да бидат затворени во најтоплиот дел од денот. По 17 часот се препорачува просториите да се проветрат“, советува Здравески.

Лекарите препорачуваат и полесна исхрана, со помалку мрсна и висококалорична храна, како и избегнување намирници со големо количество шеќери. Се советува носење лесна и светла облека, капа и заштитни очила, а при изложување на сонце употреба на заштитен фактор SPF 30.

— реклама —

Посебно внимание треба да се посвети на симптомите на топлотен удар. Меѓу нив се вртоглавица, главоболка, губење на свеста и мускулни грчеви. Топлата и сува кожа, исто така, е знак поради кој треба веднаш да се побара медицинска помош.

Д-р Бојан Трајковски предупредува дека покрај високите температури, сериозен ризик претставува и УВ-зрачењето, кое може да биде високо во текот на целиот ден.

„Не треба да се занемари ниту високата температура. Кај луѓето кои подолго време седат или престојуваат на сонце може да се појават различни симптоми, како покачена телесна температура и дехидрираност. Во некои случаи може да дојде и до топлотен удар“, вели Трајковски.

— реклама —

Тој советува водата да се пие постепено и во континуитет, а не да се чека да се појави жед. Во здравствените ординации веќе е зголемен бројот на случаи на сончаница и дехидрираност.

Високите температури особено се чувствуваат во густо изградените делови од Скопје. Професорот Ристо Цицонков од Машинскиот факултет објаснува дека бетонот, асфалтот и поплочените површини ја апсорбираат сончевата топлина и потоа ја ослободуваат во воздухот, создавајќи таканаречени „топлински острови“.

Според него, недостатокот на зеленило дополнително го засилува проблемот, бидејќи има помалку природна сенка и помало испарувачко ладење. Како подрачја во кои овој ефект може да биде поизразен ги наведува центарот на Скопје, како и делови од Карпош и Аеродром.

Цицонков предупредува дека доколку продолжи градежната експанзија, ефектот на топлинските острови може дополнително да се засили, особено во комбинација со топлотните бранови предизвикани од климатските промени.

Во услови на екстремни температури, затоа не е важно само што покажува термометарот, туку и каде се наоѓа човекот – под сенка и зеленило или на директно изложен асфалт и бетон.