Социјалдемократскиот сојуз на Македонија најави нова фаза на политичко дејствување преку „Скопската иницијатива“ и програмската платформа „Твоја држава, твоја шанса“, која, според партијата, претставува визија за модерна, праведна и европска држава.
На денешната прес-конференција, портпаролката и членка на Извршниот одбор на СДСМ, Богданка Кузеска, истакна дека платформата е насочена кон подобрување на животниот стандард, борба против корупцијата и обезбедување европска иднина за Македонија.
Според Кузеска, документот содржи конкретни политики за поддршка на младите, со акцент на достоинствено вработување, повисоки плати, достапно домување, квалитетно образование и создавање еднакви можности за напредок.
Од СДСМ оценуваат дека еден од најголемите предизвици со кои се соочуваат младите е чувството на неправда и недоверба во институциите, поради што борбата против корупцијата е поставена како еден од клучните приоритети во платформата.
Меѓу предложените мерки се нов антикорупциски закон, ветинг на избрани и именувани функционери, проверка на потеклото на имотот, зајакнување на институциите за борба против корупцијата и понатамошна дигитализација на јавните услуги.
Платформата содржи и економски мерки насочени кон раст на платите и пензиите, заштита на работничките права, поддршка на домашното производство, подобрување на социјалната заштита и дополнителна поддршка за земјоделците.
Во своето обраќање, Кузеска посочи дека преку „Скопската иницијатива“ партијата сака да ја зацврсти својата улога како дел од поширокото прогресивно движење кое се залага за европски вредности, демократија и владеење на правото.
Од СДСМ истакнуваат дека нивната цел е обединување околу државните интереси, економскиот развој и европската перспектива на земјата, преку формирање поширок „Фронт за вистина и правда“.
Според партијата, овој фронт не е замислен како партиски проект, туку како надпартиско општествено движење отворено за граѓани, интелектуалци, професионалци, синдикати и други општествени чинители.
