Славески: Инфлацијата им нанесува поголема штета на граѓаните отколку високите каматни стапки

Гувернерот на Народната банка, Трајко Славески, преку објава на социјалната мрежа Икс оцени дека инфлацијата претставува далеку поголем товар за граѓаните отколку повисоките каматни стапки, особено за домаќинствата со пониски приходи и за средната класа.

Во својата објава посветена на односот меѓу каматните стапки и инфлацијата, Славески посочи дека ниските каматни стапки често се доживуваат како популарна економска мерка, но предупреди дека токму тие можат да придонесат за раст на цените, што најмногу ги погодува најранливите категории граѓани.

— реклама —

„Ниските каматни стапки се популарни, но инфлацијата што ја поттикнуваат најмногу ги погодува сиромашните и средната класа“, наведува гувернерот.

Според него, штетата што ја предизвикуваат високите цени е значително поголема од товарот што го носат повисоките каматни стапки.

— реклама —

Славески оценува дека доколку инфлацијата во изминатите години била пониска, реалните плати би растеле со побрзо темпо, а куповната моќ на граѓаните би била поголема.

— реклама —

Тој посочува и дека ниските каматни стапки го поттикнуваат растот на цените на недвижностите и на другите облици на имот.

Осврнувајќи се на достапноста на становите и на другите добра што најчесто се купуваат со кредит, гувернерот нагласува дека тие не станале недостапни поради повисоките каматни стапки, туку затоа што граѓаните се принудени да земаат кредити со значително повисоки износи.

„Становите и другите добра што се купуваат на кредит не станале недостапни за многумина поради високите каматни стапки, туку поради нужноста да се земе кредит на повисок износ“, истакнува Славески.