Славески со македонскиот тим од Меѓународната економска олимпијада: финансиски писмени млади се важен предуслов за стабилна и просперитетна економија

Македонските средношколци се вратија со бронзен медал од 9. Меѓународна економска олимпијада, која се одржа во Шенжен, а нивниот успех беше повод за средба со гувернерот на Народната банка, Трајко Славески.

Славески истакна дека вложувањето во знаењето и вештините на младите е вложување во идниот развој на државата. Тој посочи дека финансиската едукација и инклузија на младите се меѓу важните заложби на Народната банка.

— реклама —

„Добро информираните и финансиски писмени млади се важен предуслов за стабилна и просперитетна економија. Средношколците, кои денес со своите знаења ја претставуваат нашата земја на меѓународната сцена, утре ќе бидат носители на иновации, претприемаштво и економски развој“, истакна Славески.

— реклама —

Гувернерот му честиташе на целиот национален тим за постигнатиот резултат во конкуренција од 260 натпреварувачи од 56 земји. Посебно го истакна успехот на Теа Ангелова, ученичка во втора година во Меѓународното училиште „НОВА“ во Скопје, која освои бронзен медал, а го освои и второто место на „IEOx Youth Talks“.

На Олимпијадата учествуваа и Ванеса Томова од ПСУ „Јахја Кемал“ во Скопје, Оливера Џамбазова од СУГС „Орце Николов“ во Скопје, Стефан Младеновски од СОУ „Јосиф Јосифовски“ во Гевгелија и Георги Јаковлев од ПСУ „Јахја Кемал“ во Струга.

— реклама —

Нивни ментори во подготовките и за време на Олимпијадата беа проф. д-р Анета Гацовска Барандовска и ас. м-р Стево Ѓоргиев од Институтот за математика при Природно-математичкиот факултет во Скопје.

— реклама —

Учениците на натпреварот решавале сложени економски проблеми, го покажале своето знаење од областа на финансиската писменост и презентирале бизнис-план. На средбата со гувернерот ги споделиле своите искуства и се заблагодариле за поддршката од Народната банка во подготовките.

Народната банка, во соработка со Сојузот на математичари, четврта година по ред учествува во подготовките на македонските средношколци за Меѓународната економска олимпијада. Подготовките опфаќаат стручни и едукативни активности од областа на економијата, финансиите и банкарството.