Гувернерот на Народната банка, Трајко Славески, учествува на годишниот состанок на Конституенцата на Меѓународниот монетарен фонд и Светската банка, кој годинава се одржува во Варна под мотото „Претворање на неизвесноста во долгорочна можност“.
На состанокот, во кој учествуваат претставници од земјите членки на Конституенцата, акцентот е ставен на одржувањето на макроекономската и финансиската стабилност во услови на глобална неизвесност, дигиталната трансформација, продуктивноста и финансиската вклученост, како и на позицијата на европските економии во светските синџири на вредности.
Во рамки на настанот, Славески остварил билатерални средби со извршниот директор на Конституенцата во Меѓународниот монетарен фонд, Јерун Клик, заменикот на извршниот директор Марникс ван Рај, како и со потпретседателката на Светска банка за Европа и Централна Азија, Антонела Басани.
На средбите било истакнато дека зачувувањето на ценовната стабилност претставува клучен предуслов за одржлив економски раст и финансиска стабилност, особено во услови на засилени геополитички ризици, неизвесност во глобалната економија и забрзани технолошки промени.
„Народната банка внимателно ги следи домашните и меѓународните економски движења и ги презема сите потребни мерки за одржување на ценовната и финансиската стабилност“, посочил Славески, нагласувајќи дека на тој начин се зајакнува довербата во монетарниот систем и се создаваат стабилни услови за економски развој.
На состаноците се разговарало и за тековните макроекономски движења, отпорноста на финансискиот систем, предизвиците поврзани со геополитичките случувања, како и за улогата на дигиталната трансформација во поттикнувањето на економскиот раст и продуктивноста.
Воедно, била потврдена и добрата соработка меѓу Народната банка, ММФ и Светската банка во спроведувањето на реформите и јакнењето на институционалните капацитети.
Во состав на македонската делегација се и вицегувернерот Игор Величковски и заменик-министерот за финансии Николче Јанкуловски.
