Дигитализацијата на финансискиот систем отвора нови можности за развој на финансиските услуги, но истовремено наметнува и потреба од внимателно управување со ризиците и зачувување на финансиската стабилност, порача гувернерот на Народната банка, Трајко Славески, на регионалниот семинар „Криптосредства и дигитални пари“ што се одржа во Приштина.
На настанот, организиран од Централна банка на Косово, учествуваа гувернери, регулатори и финансиски експерти од регионот, кои дискутираа за предизвиците и можностите што ги носи дигиталната трансформација во финансискиот сектор.
Во рамки на панел-дискусијата посветена на криптосредствата и дигиталните пари, Славески истакна дека криптопазарот во земјава засега е релативно мал и не претставува значителна закана за финансиската стабилност, но нагласи дека е неопходно воспоставување јасна регулаторна рамка усогласена со европските стандарди.
„Потребна е современа регулатива која ќе обезбеди заштита на корисниците, правна сигурност и ефикасен надзор над овој сегмент од финансискиот систем“, истакна Славески.
Тој посочи дека дигиталните форми на пари можат да придонесат за поголема ефикасност на плаќањата и поширока финансиска вклученост, но предупреди и на ризиците поврзани со финансиската стабилност, спречувањето перење пари и зачувувањето на монетарниот суверенитет.
На семинарот било разговарано и за влијанието на дигиталните валути врз монетарната политика, при што посебно внимание било посветено на потенцијалните ефекти од воведувањето на дигиталното евро врз помалите и отворени економии.
Славески информираше дека Народната банка внимателно ги следи глобалните трендови во оваа област и ги анализира можностите и последиците од евентуално воведување дигитален денар.
Според него, во соработка со меѓународни институции, меѓу кои и Светска банка, веќе се спроведуваат анализи за потенцијалната побарувачка и улогата што би можела да ја има дигиталната валута на централната банка во домашниот финансиски систем.
Гувернерот нагласи дека криптосредствата и дигиталните пари сè повеќе стануваат дел од современите финансиски текови, но нивниот развој мора да биде проследен со соодветна регулатива, ефикасен надзор и внимателно управување со ризиците.
