Славески за клиентите на Алта банка: Повисок неделен лимит и целосна исплата на идните приливи

Народната банка продолжува со постепено олеснување на условите за располагање со средствата на клиентите на Алта банка, а гувернерот Трајко Славески најави три нови мерки со кои ќе им се овозможи полесен пристап до парите и користење на банкарските услуги.

Од понеделник, 9 ноември, ќе бидат отворени шалтери и во Тетово и Струмица. На нив граѓаните што немаат платежни картички ќе можат да подигнат до 20.000 денари, без да мора да патуваат до Битола. За жителите на Прилеп, Ресен и Охрид ќе биде организиран автобуски превоз до филијалата на Алта банка во Битола, за да можат да ги подигнат пензиите и социјалната помош.

— реклама —

Второто олеснување се однесува на зголемувањето на неделниот лимит за подигање готовина и плаќање на продажни места со платежните картички на банката. Од следната недела тој ќе биде зголемен од 10.000 на 15.000 денари.

„ Од следната недела неделниот лимит за подигање готовина и плаќање на продажните места со платежните картички на Банката ќе се зголеми од 10.000 на 15.000 денари. Третото олеснување се однесува на сите идни приливи од плати, пензии и социјални трансфери кои доаѓаат од институции или компании што имаат сметки во други банки. Овие граѓани ќе можат да ги повлечат средствата во целост, повторувам, во целост, без ограничување на износот. Со тоа, клиентите на Банката нема да имаат потреба да отвораат платежна сметка во друга банка“ рече Славески.

— реклама —

Славески информираше дека исплатите на клиентите се одвиваат според утврдениот распоред. Исплатата на средствата за граѓаните без платежни картички започнала претходниот ден и продолжува во наредните денови, додека исплатата на социјалната помош започнала денеска. Филијалата во Битола работи во две смени, а ќе биде отворена и во сабота, на 7 ноември.

— реклама —

Во текот на денот во експозитурата во Битола биле услужени околу 660 клиенти. Просечниот износ што го подигнале клиентите претходниот ден изнесувал околу 19.000 денари, додека денеска бил околу 16.000 денари, што, според Славески, е очекувано поради пониските износи на социјалните трансфери.

Гувернерот нагласи дека Алта банка продолжува да работи, не е во стечај и не ѝ е одземена дозволата за работа. Привремената администрација е мерка што се применува до промена на сопственоста. Тој оцени дека состојбата во банката е добра, дека таа е ликвидна и високо капитализирана и дека има солиден квалитет на кредитното портфолио.

— реклама —

Средствата на клиентите остануваат на нивните сметки, а привремените ограничувања се однесуваат на начинот на располагање со нив. Тие се воведени со цел да се зачува ликвидноста на банката и да се заштитат интересите на штедачите.

Народната банка континуирано ја следи состојбата и ги приспособува мерките во согласност со нејзиниот развој. Приоритет останува уредното опслужување на граѓаните и заштитата на интересите на клиентите, а од институцијата ги повикуваат граѓаните да ги следат информациите објавени преку нејзините официјални канали.