„Следната недела ќе биде комплетиран проектот за набавка на 100 нови амбулантски возила“, најави Алиу

Системот за итна медицинска помош наскоро ќе биде значително зајакнат со набавка на 100 нови амбулантски возила, најави министерот за здравство Азир Алиу.

— реклама —

Тој информираше дека проектот е во финална фаза и се очекува целосно да биде реализиран во текот на следната недела. Според него, новите возила ќе придонесат за подобрување на здравствената инфраструктура и ќе овозможат побрзи и посовремени услуги за граѓаните.

— реклама —

„Проектот е при крај и очекуваме следната недела да биде комплетирана набавката на 100 нови амбулантски возила, кои ќе претставуваат значајно унапредување на здравствениот систем и ќе овозможат нудење услуги во реално време“, изјави Алиу.

Министерот посочи и дека Владата го разгледува моделот за издвојување на Првата помош како самостојна институција во Скопје, со цел зголемување на ефикасноста на итните здравствени интервенции.

— реклама —

„Доколку овој модел се покаже како успешен, ќе се разгледа можноста за негово проширување и во други здравствени установи“, рече Алиу.

Според министерот, планираните реформи имаат за цел да обезбедат побрза и поквалитетна здравствена услуга, како и натамошна модернизација на системот преку нова инфраструктура и дигитални решенија.