Снег, дожд и силен ветер создаваат проблеми во сообраќајот низ Хрватска

Неповолните временски услови предизвикуваат проблеми во сообраќајот низ Хрватска, каде што во делови од земјата паѓа снег, а силниот ветер ги отежнува движењето и поморскиот сообраќај. Во Горски Котар повремено има снежни врнежи, додека коловозите во поголемиот дел од земјата се влажни и лизгави.

Поради силниот ветер, на одредени патишта долж крајбрежјето се воведени ограничувања за некои категории возила. Во прекин се и дел од траектните, катамаранските и бродските линии.

— реклама —

Хрватскиот автоклуб предупредува на опасност од одрони и задржување поголеми количества вода на коловозите поради обилните врнежи. На одделни делници сообраќајот е забавен и поради магла, па возачите се повикуваат да ја приспособат брзината на условите и да одржуваат безбедно растојание.

— реклама —

Забавено движење и повремени застои има на загрепската обиколница А3, меѓу клучката Лучко и мостот Сава, во правец кон Липовац. Проблеми има и на автопатот А2 Загреб – Мацел, каде што поради дефект на товарно возило на мостот Сава, меѓу клучките Јанкомир и Запрешиќ, сообраќајот во правец кон Мацел се одвива по една лента, со ограничување на брзината од 60 километри на час.

Денеска во Хрватска се очекува претежно облачно, дождливо и ветровито време, со можност за пообилни врнежи и грмежи. Во текот на попладнето дождот ќе ослабне, а во повисоките планински предели ќе преминува во лапавица и снег.

— реклама —

На копното ќе дува умерен до засилен североисточен и северозападен ветер, додека на Јадранот југозападниот ветер и југо ќе преминат во силна, повремено и бурна бура. Температурите ќе бидат во опаѓање и ќе се движат од 5 до 10 степени на копното, а од 14 до 21 степен на Јадранот.

— реклама —

Во сабота се очекува претежно сончево и постудено време, со утринска магла на одделни места во внатрешноста. Бурата на Јадранот постепено ќе слабее. Температурите ќе се движат од 6 до 11 степени на копното и од 13 до 17 степени на крајбрежјето и островите.

Во недела ќе преовладува променливо облачно време со сончеви периоди, а во внатрешноста наутро се очекуваат магла и слана. На морето ќе биде потопло под влијание на југото, но со променлива облачност и можност за дожд, кој попладне може да ги зафати и Лика и Горски Котар.